A XUNTA IMPULSA A INSERCIÓN LABORAL DOS TITULADOS DE FP, QUE PODERÁN TER UN CONTRATO DE TRABALLO TAN PRONTO OBTEÑAN O TÍTULO

§         Estímase que o proxecto beneficiará a 1.400  estudantes e outras tantas empresas que recibirán incentivos á contratación cun orzamento inicial de 3,5 millóns, ampliable en caso de que sexa necesario

§         As consellerías de Cultura e Educación e mais a de Economía, Emprego e Industria poñen en marcha este novo programa para favorecer a empregabilidade dos mozos e mozas naquelas empresas onde realizaron as prácticas do ciclo formativo

§         Os que queiran participar deberán acceder ao Sistema de Garantía Xuvenil que desenvolve a Consellería de Economía

A Consellería de Cultura, Educación e Ordenación Universitaria e mais a de Economía, Emprego e Industria acaban de poñer en marcha un novo programa para impulsar a inserción laboral na Formación Profesional, do que se poderán beneficiar como mínimo 1.400 estudantes e outras tantas empresas. Os conselleiros Román Rodríguez e Francisco Conde explicaron hoxe no CIFP A Xunqueira de Pontevedra un acordo de colaboración para favorecer a empregabilidade dos titulados de FP, que poderán ter un contrato de traballo na empresa onde realizaron a FCT (formación en centros de traballo) tan pronto obteñan o título.

Segundo explicou o titular do departamento educativo da Xunta de Galicia, estamos “ante un novo impulso á Formación Profesional, no que a Xunta exerce de ponte directa entre o sistema educativo e o mercado laboral, asegurando un posto de traballo para os nosos mozos e mozas unha vez rematen os seus estudos”.

Neste sentido, asegurou que este programa beneficiará tanto a alumnos como empresas. Aos primeiros porque se incorporan directamente ao mercado de traballo con coñecementos precisos e especializados, xa que poderán desenvolver a súa actividade na compañía onde realizaron as prácticas do ciclo. Neste contexto tamén salientou o compromiso do seu departamento á hora de tecer vínculos entre a oferta formativa e o tecido socioproductivo de cada zona, ben a través da FCT, ou ben mediante o desenvolvemento de proxectos de FP Dual.

Ata 8.200 euros de axuda

Pero esta iniciativa tamén beneficia, en palabras de Román Rodríguez, aos empresarios, dado que se nutren de persoas altamente cualificadas e fornadas nas particularidades do seu centro produtivo. Ademais, as empresas recibirán incentivos á contratación que poden chegar ata os 8.200 euros, dependendo do tipo de contrato.

Pola súa banda, o conselleiro de Economía, Emprego e Industria, Francisco Conde, sinalou que este acordo dá resposta a unha demanda das propias empresas onde os alumnos e alumnas de FP desenvolven as súas prácticas para que poidan obter un contrato laboral.

Para levar a cabo esta iniciativa, o Goberno galego, tal e como apuntou Conde, investirá un total de 3,5 millóns de euros en incentivos á contratación indefinida ou temporal. Este crédito será ampliable segundo a demanda. A Xunta tamén apoiará a transformación dos contratos temporais en indefinidos.

O prazo para optar a estas axudas xa está aberto e rematará o próximo 30 de setembro. A estes apoios sumaranse, ademais, segundo afirmou Conde, as bonificacións das coutas á Seguridade Social que poderán ser de ata o 100%.

Información directa desde o centro a alumnado e empresa

Este acordo de colaboración entre os dous departamentos do Goberno galego nace ao abeiro do Sistema de Garantía Xuvenil, dirixido a persoas de idades comprendidas entre os 16 e os 30 anos; e do Programa APROL, orientado a incentivar a contratación nos colectivos máis sensibles, entre eles o da mocidade.

O novo programa actuará en dous niveis, posto que facilitará o acceso do alumnado ao Sistema de Garantía Xuvenil desde os propios centros de Formación Profesional, e favorecerá que as empresas colaboradoras coa Consellería de Educación no desenvolvemento da FCT poidan acceder ás axudas do Programa APROL.

Deste xeito, os departamentos de orientación dos CIFP, que recibirán información específica, informarán ao alumnado da oportunidade de acceder ao Sistema de Garantía Xuvenil, mentres que os responsables do departamento de relación con empresas trasladarán ás compañías coas que colaboran os beneficios do programa de incentivos á contratación temporal de persoas inscritas no dito Sistema.

Este mesmo curso

O programa comezará a andar a principios do mes de xullo, unha vez que os equipos de orientación dos CIFP (Centros Integrados de Formación Profesional) reciban a formación específica para desenvolver o proxecto. Por tanto, poderá participar tanto o alumnado que este curso remata a FCT, co requisito de que pasen 30 días desde a finalización das súas prácticas, como titulados doutros anos.