§
O vicepresidente da Xunta, Alfonso Rueda, e a conselleira de Medio
Ambiente e Ordenación do Territorio, Beatriz Mato, e o conselleiro delegado de
ENCE, Ignacio de Colmenares y Brunet deron conta nunha rolda de prensa do contido do Pacto Ambiental, asinado esta tarde entre a Xunta e Ence
§
O documento asinado constitúe unha folla de ruta que inclúe medidas
concretas, cos orzamentos consignados para cada unha delas e cos seus
respectivos calendarios de execución
§
Entre outras, destaca o investimento de máis de 30 millóns para accións
de mellora na eficiencia da factoría en aspectos como a redución do impacto acústico
e dos olores; modificacións no ciclo da auga e actuacións de integración
paisaxística
§
Así mesmo, recolle a posta en marcha dun programa marco para programas
sociais e ambientais coa consignación de tres millóns de euros anuais, que
permitirá a concesión de bolsas e axudas
§
Cómpre destacar tamén o compromiso que permitirá crear un Centro de
investigación especializado na explotación sustentable dos recursos forestais,
para o que se propón o Pazo de Lourizán
§
No pacto confírmase a colaboración de ENCE, con 15 millóns de euros,
para o proxecto de ampliación e modernización da EDAR de Praceres que
desenvolverá a Consellería de Medio Ambiente
A conselleira de Medio Ambiente,
Beatriz Mato Otero, e o conselleiro delegado de ENCE, Ignacio de Colmenares y
Brunet, asinaron hoxe o Pacto ambiental con ENCE, un acordo realizado ao amparo
do decreto 295/2000 de 21 de decembro, no que se recollen máis dunha decena de
actuacións a través das que a empresa compromete preto de 200 millóns de euros
nos próximos catro anos en distintas iniciativas que beneficiarán especialmente
a Pontevedra e á súa comarca, pero tamén a outros puntos de Galicia.
Na esta
sinatura, celebrada na delegación da Xunta en Pontevedra, estivo presente tamén
o vicepresidente da Xunta, Alfonso Rueda; o delegado territorial da Xunta en
Pontevedra, José Manuel Cores Tourís, e o secretario xeral de Calidade
Ambiental, Justo de Benito.
Este pacto
constitúe unha folla de ruta completa, na que se inclúen medidas concretas, cos
seus orzamentos e calendarios de execución respectivos. De feito, todas as
actuacións recollidas no documento vanse iniciar este mesmo ano.
O vicepresidente
da Xunta, Alfonso Rueda, celebrou que quede negro sobre branco o compromiso de
ENCE con Pontevedra e a súa comarca, tal e como lle reclamou a Xunta; ao que
engadiu que se trata dun compromiso de investimentos en materia ambiental,
económica e social, que redundará directamente en beneficios para todos os
cidadáns de Pontevedra e de Galicia.
Así, entre
os investimentos, inclúese unha partida de 30 millóns de euros para a mellora
da eficiencia no complexo industrial de Lourizán. En concreto, con respecto a
estas últimas, cabe destacar que 12 millóns se consignarán á redución do
impacto acústico e de olores; uns 15 millóns ao tratamento e rexeneración de
augas no complexo; e preto de 4 millóns á integración paisaxística.
Investimento social e investigación
O pacto
inclúe tamén un compromiso de dotación de 3 millóns de euros anuais para o
desenvolvemento dun novo Programa marco para a posta en marcha de actuacións de
carácter social e ambiental que beneficien á comarca de Pontevedra. Isto
desenvolverase tamén a través dun convenio e as súas actividades concretaranse
ano a ano no seo da Comisión mixta de seguimento deste acordo, que estará
conformada por dous membros da Consellería de Medio Ambiente e dous por parte
de ENCE.
Recollese
tamén un investimento de 10,6 millóns de euros para a creación dun Centro de
investigación e desenvolvemento especializado na explotación sustentable dos
recursos forestais, que situará a Pontevedra á vangarda da investigación neste
eido. Do total, ENCE destinará 5 millóns para o acondicionamento dunha sede en
colaboración coa Xunta. Para este centro, a Administración autonómica considera
que se plantexe como sede o Pazo de Lourizán.
No documento
ratifícase tamén a achega de 15 millóns de euros co que a empresa colaborará na
ampliación e modernización da EDAR de Praceres, o que redundará nunha mellora
fundamental na depuración e saneamento de augas da ría. Neste caso tamén, as
condicións do investimento concretaranse nun convenio que se asinará nos
vindeiro trimestre.
A isto
súmase a construción e posta en marcha dun novo centro de coxeneración de
biomasa nas instalacións de Lourizán, así como de tres novos centros de
bioenerxía en distintos puntos de Galicia.
No hay comentarios:
Publicar un comentario