AREEIRO ACONSELLA ELIMINAR VEXETACIÓN TANTO NA PROPIA VIÑA COMO NO SOLO PARA EVITAR O EXCESO DE HUMIDADE

Os técnicos da EFA constataron un desenvolvemento excesivo da vexetación debido ás condicións climáticas e indican que é o momento idóneo para 'airear' os racimos

Apareceron os primeiros casos de Oidio en uva albariña polo que se recomenda que se trate este fungo ao tempo que se renovan os tratamentos contra o Mildeu

As condicións metereolóxicas de humidade e temperaturas suaves das últimas semanas deron como resultado un excesivo desenvolvemento da vexetación das viñas e no solo, polo que desde a Estación Fitopatolóxica de Areeiro sinalan que agora é o momento de eliminar toda a parte sobrante tanto da viña como da cuberta vexetal. Os técnicos da EFA consideran que o importante neste punto é evitar a retención excesiva de humidade e 'airear' os racimos, polo que o recomendable é segar a cuberta vexetal e retirar a parte vexetal sobrante da viña.

En canto aos tratamentos máis acaídos para esta semana, desde a EFA séguese incidindo na loita contra o Mildeu ao tempo que alertan sobre a aparición dos primeiros síntomas de Oidio na uva albariña.  No caso do Mildeu constataron danos importantes en diversas zonas pero con escasa incidencia nos racimos. Ante esta situación e cunha previsión de tempo seco e soleado ata a última semana do mes, a recomendación é renovar os tratamentos nas parcelas que presentes síntomas viables e, en todo caso, extremar a vixilancia de xeito periódico posto que o racimo é extremadamente sensible ao fungo.

No caso do Oidio, que xa aparecera en variedades de uva tinta, constatouse o primeiro síntoma en uva albariña na parcela de seguimento de Castrelo, que é a zona na que vén aparecendo nos últimos anos. Desde Areeiro a recomendación neste caso é aproveitar os tratamentos que se están dando contra o Mildeu para introducir  un antioidio.

En canto ás demais enfermidades da viña espérase que permanezan estables. A EFA indica que no caso de brotite non é preciso tratar neste momento posto que se espera que as condicións meteorolóxicas -temperaturas altas, falta de precipitacións e vento do norte- freen o desenvolvemento do fungo.