A ESCOLA INFANTIL CHUPETES, DE PRÍNCIPE FELIPE, ABRE O PRAZO PARA SOLICITUDE DE INGRESO PARA NOVOS ALUMNOS

O prazo de matrícula será do 16 de xullo ao 2 de agosto

·       Permanecerá aberto ata o vindeiro 3 de xullo, con 67 prazas dispoñibles

·       O 50% das prazas quedou cuberta co alumnado xa matriculado no curso anterior, que optou na súa totalidade pola renovación

·       A Escola conta cunha gran flexibilidade horaria e de quendas para facilitar a conciliación da vida familiar e laboral

A Escola Infantil Chupetes, do Centro Príncipe Felipe, ten aberto o prazo de reserva de prazas para novos alumnos e alumnas. As familias interesadas poderán presentar as súas solicitudes ata o mércores, 3 de xullo.

O centro dispón de 114 prazas, das cales o 50% quedou cuberto pola renovación de matrícula dos nenos e nenas que xa están realizando o 1º ou 2º curso do primeiro ciclo de educación infantil neste centro e que renovaron na súa totalidade.

Deste xeito, son 67 as prazas que quedan dispoñibles para alumnado de novo ingreso, distribuídas en 12 prazas para nenos e nenas de 0 a 1 anos, 24 para o grupo de 1 a 2 anos e 31 para o grupo de 2 a 3 anos.

Unha vez rematado o prazo de reserva de praza, realizarase o baremo das solicitudes e o 8 de xullo poderase consultar a relación provisional de persoas admitidas e non admitidas na propia Escola Infantil, para posibles alegacións. A lista definitiva estará a disposición dos interesados no mesmo lugar a partir do luns 15 de xullo.

A formalización da matrícula poderá realizarse entre o 16 de xullo e o 2 de agosto.

Máxima flexibilidade

Este centro, dependente da Deputación Provincial, atende a nenos e nenas de 0 a 3 anos dando grandes facilidades para a conciliación da vida familiar e laboral, tanto pola amplitude de horario como pola flexibilidade á hora de variar de quenda durante o curso.

Así, a un horario moi amplo, de luns a venres de 7:30 a 22:30 horas, suma o feito de ser unha das poucas escolas infantís que abre de forma ininterrompida os doce meses do ano e a posibilidade de que os nenos e nenas nela matriculados acudan ao centro nas quendas que mellor encaixen cos horarios laborais dos seus proxenitores, podendo varialas sen problema ao longo do curso.

Isto é especialmente relevante para moitos pais e nais que traballan a quendas, variando a turnos de mañá ou tarde por días, semanas ou meses. A escola infantil de Príncipe Felipe permite, que nestes casos os nenos e nenas matriculados nela poida cambiar de horario de mañá a tarde e viceversa tanto por días como por semanas ou meses.

O centro ofrece unha programación moi completa para atender o desenvolvemento integral dos nenos. Neste sentido, no curso actual puxo en marcha actividades orientadas á familiarización co inglés cuns resultados moi positivos.

A escola dispón de 2 aulas de 0 a 1 anos, 3 para o alumnado de 1 a 2 anos e outras 3 para os de 2 a 3 anos. Así mesmo, dispón dun servizo médico de urxencia no propio centro, e un servizo de comedor con posibilidade de almorzo, xantar, merenda e cea.